Woh Apne Ishq Mein Kaisa Kamal Rakhta Hai ,
Ke BeRukhi Mein Bhi, Mera Khayal Rakhta Hai ..
Jo Aaj Mera Nahi Hai Woh Kal Mera Hoga ,
Kay Har Zamana Urooj-O-Zawal Rakhta Hai ..
Ajab Nahi Woh Jahan Bhar Ko Bewafa Samjhe ,
Nazar Mein Meri Wafa Ki Misaal Rakhta Hai ..
Kahan Talak Koi Dast-E-Karam Ko Zehmat De ,
Tamaam Sehar Hi Dast-E-Sawaal Rakhta Hai ..
Meri Uraan K Aagay Hai Kis Qadar Be-Bas ,
Yeh Aasman, Jo Sitaron Ka Jaal Rakhta Hai ..
Tera Khayal Hi Kuch Meherban Hai Verna ,
Jahaan Mein Kaun Kisi Ka Khayal Rakhta Hai ..
Woh Apne Ishq Mein Kaisa Kamal Rakhta Hai ,
Kay BeRuckhi Mein Bhi, Mera Khayal Rakhta Hai
No comments:
Post a Comment