apane na ho sake jo dil kaa qaraar ho kar
aaNkhon mein bas gaye hain rang-e-bahaar ho kar
pahale na ye Khabar thi hai maut dil kaa aanaa
jo phool khil rahaa thaa khaTakaa vo Khaar ho kar
ham dil mein dafn kar ke sab murdaa hasaraton ko
Kaamosh jal rahe hain shamm-e-mazaar ho kar
ham apane dil kaa fasaanaa unhen sunaa na sake
lagi hai aaG jo dil mein use bujhaa na sake
teri talaash mein dar-dar ki Thokaren khaayin
meri wafaa ke qadam phir bhi Dagamagaa na sake
zaraa to soch ke us dil kaa haal kyaa hogaa jo door
reh na sake tere paas aa na sake
ham unko yaad na karate pe dil kaa kyaa kijiye hazaar bhoolanaa chaahaa magar bhulaa na sake
badanaam na ho jaaye muhabbat ka fasaanaa
ai dard bhare aaNsuo aaNkhon mein na aanaa
duniya mein muhabbat ki yehi reet hai ai dil jal jaanaa
magar honTon pe fariyaad na laanaa
kah de naa kahin aaNkh mere dil ki kahaani
ai dil teri dhaDakan kahin sun le na zamaanaa
ai jaan-e-muhabbat yehi bas meri duaa hai
ho jaaye tere saath meri jaaN bhi ravaana
taras naa jaao kahin manzil-e-wafaa ke liye
kisi se pyaar na kar baiThanaa Khudaa ke liye
Khudaa se maaNg ke tujh ko na jab tujhe paayaa
uThe na haath mere phir kabhi duaa ke liye
kisi kaa tohafaa kabhi rad nahin kiyaa jaataa
wo dukh jo us ne diye main ne muskuraa ke liye '
qateel' jab bhi lage gi kahin adaalat-e-ishq
bas ek tum hi chune jaao ge sazaa ke liye
No comments:
Post a Comment